دوپہر

 درپیش ہیں کئی دوپہریں مجھے

جس میں تیرا سایہ مجھ پر نہیں

اور تیری باتوں میں میری بات نہیں

تیری یادوں میں میری اب کوئی یاد نہیں

میں موج تھا تو تھا دریا

آج بھی ضبط کا بند ٹوٹا تو نہیں

ہم ڈھونڈ لاتے کوئی تجھ سا

پر اس زمیں پر کوئی تجھ سا ہے ہی نہیں

کیسی رات ہے اتری اذن

جس کی کوئی صبح نہیں

اس محبت کی یاد میں

اس محبت کی یاد میں
جو محبت ہم سے کبھی ہو نہ سکی
اقرار کی کبھی توفیق نہ ہوئی
وہ بات جو ہم سے کبھی کہی نہ جاسکی
اس کے نہ ملنے کا دکھ تو ہے
پر شکایت کبھی لبوں پر نہ آسکی
کاش ہم دنیا کے مزاجوں میں رنگ جاتے
پر صد افسوس کہ یہ خواہش بھی ہمیں تیرے قریب نہ لا سکی
ادھورے ادھ لکھے خط جو تیرے نام تھے
مصیبت یہ تھی کہ کہ لفظ میرے خاموش تھے
اور قاصد کی زبان تجھ سے کچھ کہنے کی تاب نہ لا سکی
ہمیں فراق کی کچھ ایسی عادت ہوئی ہے اب
کہ وصل کی امید بھی اس دل نامراد میں جگہ نہ پا سکی
ہم آج بھی تیرے شہر میں بستے ہیں
روز انہی رستوں پر چلتے ہیں
تو نہیں تیری یاد سے ہم یاری رکھتے ہیں
اصلیت یہ ہے کہ تو ہوتی یا کہ تیری یاد ہے
زندگی کبھی ہمیں سنوار نہ سکی

کوئی خط لکھ مجھے

کوئی خط لکھ مجھے
تاکہ میں اسے سنبھال رکھوں
اپنے بٹوے کے کسی خانے میں
یا پھر کسی کوٹ کی اندر کی جیب میں
کہ جب تیری یاد سے بے حال ہو جاوں
تو ان لفظوں کو چھو کر
تیرا لمس محسوس کر سکوں
تیری تصویر بنا سکوں
تیرے بالوں میں کنگھی کر سکوں
اور پھر جب مروں
تو میرے ترکے میں تیرا کچھ تو ہو
کوئی خط لکھ مجھے

میں کہانیاں کیوں لکھتا ہوں

تم جو پوچھتی ہو کہ میں کہانیاں کیوں لکھتا ہوں؟
میں تو کہانیاں تم کو سنانے کو لکھتا ہوں
تاکہ کچھ دیر کوئی بات تو ہو
میں کچھ دیر تیری آنکھوں میں جھانک سکوں
تجھے تیری زلفوں سے کھیلتا دیکھوں
تو میرے سامنے چائے پیئے
تیرے ہونٹوں کا نقش چائے کی پیالی پر پیوست ہو
چائے کی پیالی سے اٹھتی بھاپ تیرے چشمے کے شیشوں پر سمٹ جائے
اور پھر میں دنیا کے سب کام چھوڑ کر تیرے چشمے کے شیشے صاف کروں
میں تو کہانیاں اس لئے لکھتا ہوں
کہ میرے لکھے لفظوں کو تیری شرف قبولیت حاصل ہو
میرے لکھے کرداروں سے تو رضامند ہو
تب ہی میں روز اک نئی کہانی گھڑ کر لے آتا ہوں
اس کہانی کو بننے کا مقصد صرف تم ہوتی ہو
پر پھر بھی روز تم مجھ سے کہتی ہو
میں کہانیاں کیوں لکھتا ہوں؟

تم کہ جو ہزار رنگ ہو

تم کہ جو ہزار رنگ ہو
ہر رنگ میں بھلی لگتی ہو
ہر رنگ میں میری لگتی ہو
وہ دعا جو نصیب کھول دے وہ دعا لگتی ہو
وہ آیت جو زمیں پر اتاری گئی
کہ جس کہ پڑھنے سے ہر آفت دور ہوجائے
وہ آیت لگتی ہو
کمال ہے اس دنیا کا دستور
تم اس دستور سے کی گئی بغاوت لگتی ہو
ہر محفل میں ہے چرچا تیرا
کبھی سرگوشی تو کبھی افواہ لگتی ہو
تجھے دیکھ کر زمانے کے دکھ جھڑتے ہیں
لوگ تیرا نام لے کر آہیں بھرتے ہیں
کبھی معجزہ تو کبھی وعید لگتی ہو
نجم کی چال ہو
یا قسمت کی لکیریں
تجھے کوئی کیسے اپنے بس میں کرے
تجھے کیسے کوئی اپنا کرے
بہت عام ہے تو پھر کیوں سب سے جدا لگتی ہو
میں نے جان لی ہے حقیقت تیری
تیری جستجو بے سود نہیں
تو تو منزل ہے ہی نہیں
میری جاناں تم تو منزل کا رستہ لگتی ہو
تم کہ جو ہزار رنگ ہو
تم کہ جو ہزار رنگ ہو

شہروں کی کہانیاں

اس شہر کے مرنے کا
دکھ سب ہی کو کافی تھا 
پر اس بچے کو سب سے زیادہ تھا
جس کا دادا یہاں جنما تھا
اس کا سارا بچپن
اس شہر کی کہانیاں سنتے گزرا تھا
جب یہ شہر توانا ہوتا تھا
ہر دن یہاں سہانہ ہوتا تھا
نیند سکون کی ہوتی تھی
بھوک تھی پر روٹی مل جایا کرتی تھی
بارود کی بو سے خلق انجان تھی
تب اس شہر میں زندگی رواں تھی
اب جب جاڑا آئے گا
وہ اپنے دادا کی گرم چھاتی سے لگ کر
کس کی کہانیاں سنے گا
ان دونوں کے دکھ کا کچھ تو حل کرو
اس شہر کو پھر سے زندہ کرو
تاکہ دادے اپنے پوتوں کو
اپنے شہروں کی کہانیاں سناتے رہیں